I CANTI

LODE
Era bedda e un’agnula paria,
una dea di cieli e una fata.
Da li so trizzi un odori iscia
Di frisca rosa appena sbucciata.
Idda mi disi: cantu mi sei caru,
Di casa stogu in via Sant’ Alò;
la janna mira ch’è tinta di ciaru
l’ultima casa andendi a destra ignò

ANDIRRA
Pal via d’esse bona
T’aggju fattu patrona,
lu cori T’aggju datu,
Bandera d’alligna
mai no lu cridia
d’esse dura ill’amori

BRUNEDDA
Bruna è la me’brunedda
La me’brunedda è bedda!
Zincu, quattru, tre, dui e una
La me’ brunedda è bruna.
Eh, eh la me’ brunedda:
Zincu, quattru, tre, dui e una
La me’ brunedda è bruna,
La me’ brunedda è bruna.

BEDDA, LI ME’ IL TU’
Bedda, li me’ iltù
So cunsacrati a te, la me’ matrona.
No aggju altu più:
Aggju lu cori e tu sei la patrona.
La ita è in brazzi toi:
Tu mi cumandi, fanni lu chi voi.

LASSATEMI PIGNI’
Lassetimi pignì e lastimà
No vi fazzia tanta nuitai:
Nisciunu po’ ma Deu cumandà,
Cand’iddu fazi la sò ‘ulintai;
Iddu è patronu di dazzi a magnà,
Di castigazzi cu la poaltai,
Iddu ha li ciai di cant’è criatu,
A piazeri soiu tuttu dona.

Gesummaria, chi raju falatu!
Gjà po’ istà fidata una passona!

Viglini bedda acchì no m’aggjuteti
In la mè piena di la timpistai?
Sempri aggju ‘ntesu di chi no nigheti
A ca vi prega di grazi mai

Gesummaria, chi raju falatu!
Gjà po’ istà fidata una passona!

Mamma di luzi , lu mali calmeti,
Li mè prufundi di l’oscuritai.
S’aissi mai illu mundu mancatu,
Lu ‘ostru mantu l’offesi paldona.

Gesummaria, chi raju falatu!
Gjà po’ istà fidata una passona!

UNA MANI LAA L’ALTA
Una mani laa l’alta
Dittu saggju e umanu,
L’agjutassi dugna ‘olta
E’ prinzipiu cristianu

La caritai fraterna
Usata cun discrezioni
Risolvi da un dilemma
Tanti poari passoni.
(E’ veru, è veru!).

Chi so sempri assillati
Da li bisogni umani.
Da li fiddoli fammiti
Chi dummandani lu pani.

Una mani laa l’alta
Dittu saggju e umanu,
L’agjutassi dugna ‘olta
E’ prinzipiu cristianu

A TE OFFERU
A te offeru li canti d’amori
Palchì sei bedda, gentili, graziosa.

Pal te la luna dona candori,
Si speccia illa tò cara luminosa.

TANTU TEMPU
Tantu,tempu dunosa,
Era in disizu di ìdì a teni,
Pa la jenti odiosa
Sogu eu, graziosa, in tanti peni.
In tanti peni sogu,
Dunosa, si no vengu a visitatti;
Si senza di te stogu
L’ ammiratti gja m’è valutu pogu!

No mi àli a nienti
Tuttu chiddu carignu e amistai,
Si no t’aggju presenti
Cori né menti no arriposa mai.
No m’arriposa cori
Si no ti ìgu, fiori delicatu.
Di cantu t’aggju amori
A latu ti staria tutti l’ori.

FILUGNANA
Ancora sei filugnana
Comme cand’eri minori,

Ancora sei furacori
Comme cand’eri vaggjana.

Slendi comme diadema
Lu to pizu di la cara.

TIMPIESINA
Lu cori più no suppolta
Lunga dilazioni.

Dimmilla una òlta
Si mai o no passioni.

E da dugna apprensioni
Bogami pal pietai.

OTTAVA
Li dulzi rusignoli,
Li canari e suai filumeni,
Primma d’iscì lu soli
Alleviu più no dani a li me peni.

Buschi, rii e funtani
Li ninfi soi m’occultani avari,
Li sireni no sani
Cun dulzura sciuddì lu cantu in mari.

TASGJA
Ammentati di me la rosa mea
Commu di te m’ammentu a tutti l’ori.

L’ammintammi di te è ca mi brea
Di tutti li me’ spassi, allegru fiori.

Ti disizu a manzana e sera
Pal cunsulammi cu lu to amori.

BEDDU E’ LU TO ISU
Beddu è lu tò ìsu
Allegru lu to’ cori
Tu doni splendori
Astru di Paradisu.

Dulzi è lu to’ sorrisu
Amabili ill’amori
Lu to’ nommu è incisu
Deu signori.

SIDDU PENSU
Siddu pensu a la molti
Mi la fazi lu pientu:
Mi rattrista chista solti,
Mi disgusta, mi tulmentu.

No vè alta soluzioni.
L’ommu è natu pal soffrì.
Chista è la condizioni.
Semmu nati pal murì.

È lu colpo lu chi mori,
L’anima si ni bola;
Si distacca cun dulori,
ma s’è bona si cunsola.

Prima pagina